جيبوا لي اللي ما يفور من الجور = اليا ارتفع ريسه تطيح الحرارة
من مصنع اليابان ورد على الفور = عاده مغبر ما غسل من غباره
اليا اشتغل ما وحيت له حس ما طور = في اكس ار ذوق المشترى وختياره
من يوم صنع ما خذا خمسة شهور = ورد وباسمي طلعوا الاستمارة
ناديت له من خيرة الربع ممرور = لو بشروني به دفعت البشارة
يمشي صلاة الفجر مع طلعة النور = حريف ويحوفه بفن وشطاره
من السعودية مشى سيرة حدور = لبوظبي متعني من دياره
ملفاه شيخ للصعيبات مذخور = ذاك العديم اللي براسه نعاره
ناصر ولد مذكر اليا عوضب الشور = حر ينومس عاشقين الصقارة
تلقا محل يدهله كل منعور = ودلال رسلان كثير بهارة
عز الله أن الضيف بيبات مسرور = عند ابو مذكر ريف صيفه وجاره
من لابه بين القبايل لهم دور = هواجر تسقى المعادي مرارة
كم من عقيد حولوا به من الكور = وكم شيخ قوم عقبهم في المعارة
عزوتهم الهدلال الشناح أم حنجور = لا زعزعت سووا على الضد غاره
طيب وأنا في راعي الطيب مابور = ما قلتها لي قد ولا عياره
لولا الوفاء ماني على المدح مجبور = المدح في غير النشاما خسارة
المدح لو يبني عمارات وقصور = بنيت له في كل بلك عمارة
جعله فداه اللي ردي ومثبور = خاطي دويني يحفر الحجارة
حي وكنه باول العمر مقبور = طافي شنار جعل يطفي شناره
ياميرانا ما جيت حاديني قصور = زاير وشوفك يابن مذكر تجاره
قصدي سلام وكيف حالك وماجور = ولا فلا لي مقصد في الزيارة
هذا كلام مصخر الشعر بسطور = لا هيب مسروقه ولا مستعاره