هذه القصيدة موجهه من الشاعر مهيل بن راشد الى الشاعر بندر بن منصور السبيعي :

عديت يا بندر بعالي الشواهيق = عالي الجبال النايفات الشهيقه
للريح في عرضة صفير وتصافير = تصفق بجيلانه وتسمع صفيقه
ما فيه غير الطير جر التناعيق = مخلي له أيام يروجع نعيقه
عديت في رأسه من الهم والضيق = عله يفرج هم صدري وضيقه
هم ثقيل يطوق الصدر تطويق = والله يا لولا الصبر مقدر اطيقه
لازارني في بعض الايام توثيق = ضيعت بين الثانية والدقيقه
باسباب من بيني وبينه مواثيق = اخلف مواثيقه وخلى الوثيقه
اللي غلاها لاجي بالصناديق = اشعل بصندوق الضماير حريقه
اغصون قلبي يوم وصلة مواريق = خضر ورقها لينات وريقه
واليوم سود ذابلات محاريق = تلعب بها انواد الهبوب السحيقه
عليه دمع العين يدفق تدافيق = ينزل على خدي ويجري دفيقه
يزورني في لذة النوم وافيق = فرحان واحسب ان طيفه حقيقه
يهزنيله شوق سلم العشاشيق = شوق العشيق اللي يواجه عشيقه
ريمية ترعى خضار الزماليق = لاشافها القناص ضيع طريقه
تجفل ليا سمعت حديث التفافيق = ما قد رموها ناقلين التفيقه
اللي على رمي الجوازي مشافيق = وفيهم على صيد الجوازي شفيقه
اليوم يا بندر شكيت التفاريق = يمك اوجها وعيني غريقه
يابن الرجال الكايدين المطاليق = بيمانهم كم خلفوا من عويقه
لانشت مخايلها رعود وبواريق = كم شيخ قوم حولوبه عليقه
ميت وربعه عند راسة معاويق = واللي سلم منهم تناسا رفيقه
بسيوف هند تدفق الدم تدفيق = ضرباتها بين المناكب عميقه
شكيت لك هم لجا بالمعاليق = بين العروق اليابسات اللصيقه
فتح بقلبي لة دروب وطواريق = واحيا الجروح المبطيات العتيقه
لجل الصداقة والوفا والمصاديق = اقبل تحيات الصديق الصديق
تحية ما عيروها المطافيق= ولا عيروها اهل النفوس الطفيقه