البارحة ليلي قضيته محاتاه = والنوم من عيني له ايام جافي
النوم قد له مدةٍ ما عرفناه = لابان نجم سهيل جاني خفافي
وللي مزود خفة القلب وشقاه = خط الصديق اللي به الشرح كافي
يا مرحبا واعداد مزن نثر ماه = واعداد ما تذري هبوب السوافي
ترحيب احلى من لبن كل مطغاه = ترعى خضارٍ نابتٍ باشعافي
من لابةٍ لاجا نهار المثاراه = بيمانهم تروي حراب الشلافي
سبعان لامن الرشا ركب مسناه = تشبع بهدتهم نفوسٍ ضعافي
تقول حب الطير ما والله أنساه = لو كان مرن بي سنينٍ عجافي
ونا بعد مثلك هوا الطير مسلاه = أقطع على شانه بعيد الفيافي
خصٍ ليا صار اشقر جثل مثناه = خالي دقوق الريش هجرٍ وصافي
تقول فيه اهداف لا من قفيناه = وكبر الثنادي يقعسنه خلافي
لا صف سرواله علة الوكر غطاه = من فوق حرش مدرجاتٍ جلافي
جا من جبل فارس مقره ومجناه = روس الجبال العالية له مصافي
ماهوب وكري جرادٍ معشاه = لا شافها بالعين صابه عيافي
لامن سمر بالطلع من فوق متكاه = في بطن روضٍ داعبته الهيافي
نجم وحول والحباري تحاشاه = خلن كبي الجول وقفن مقافي
حول عليه ونثر الريش ودماه = مسرف ويسرف في غلبهن اسرافي
والطايره ما قط منها دعيناه = امن الرهو يردف عليها اردافي
يلعب عليها لين تاصل لمبغاه = وليا حقل يهرف عليها اهرافي
وخوة نشاما مثل شرواك تسواه = خوة شرف مال المصالح ملافي
وصلاة ربي عد حرفٍ كتبناه = على الرسول اعداد نبت الريافي