سلام يا رجل الوفا نسل الاحرار= يا بن الكريم اللي بالافعال مذكور
سلام احلى من لبن حسك الاوبار=لا ربعت ترعى زماليق وزهور
لا بكر الوسمي رعت عشب لقفار=في خايع توه من الولي ممطور
لبو مبارك مكرم الضيف والجار=عبدالله العسكر ولد كل معرور
ابن الرجال اللي لهم صيت و ذكار=يوم العلوم الاوله جالهم دور
هل سربة تقدم على الموت باصرار=بحدب السيوف مقطعة مشت الزور
لا ثارت الهيجا وسو البلا ثار=عدوانهم ما بين ميت ومكسور
كم من عقيد جاه قصاف الاعمار=من وقعهم وسط اللحد بات مقبور
روس آل علي مطوعة كل جبار=يخضع لهم بالراس غصب ومجبور
مخافة من فعل وافين الاشبار=تخضع جبابرة الملا خوفة الجور
فعولكم وصلت بعيدات الاقطار=شهاة قد جا لهاشهود وحضور
امس دعمت الحفل يا علي الكار=بمدات يمنا ما بعد مدت قصور
وقبله لكم في قمة المجد تذكار=شفنا خبرها في المجلات منشور
يوم الفويضل تحتحكم الزمن سار=عليه حمل كبر ابانات والقور
تلعب به الافكار عمس ومحتار=وابنه ورى البيبان بالسجن ماسور
شلتوا حموله عنه يا وجيه الاخيار=شلتوا حموله واصبح اليوم مسرور
ويا ما عطت يمناك من جل وابكار=صفطان من يمنى كريم ومشهور
انت سيفنا اللي للمهمات بتار=منه قفل صعب المهمات مبتور
نلجا بكم لصار بالوقت ما صار=انتم ذرانا والسقف وانتم السور
وصلاة ربي عد رذراذ الامطار=على الرسول عداد ما يطلع النور