انوار حفلتنا من البعد زامي = يجذب شعاع اضويها والمصابيح
حطت لسمحين الوجيه الكرامي = واللي حضرها من الوجيه المفاليح
عند الكريم اللي علومه جسامي = يشهد له التاريخ قبل التصاريح
عند ابو شافي يوم هب الولامي = مراجله ما هي شوي وضحاضيح
عد وروده ما تصدر ظوامي = ما صدرت منه الظوامي مشافيح
رجلٍ حوا كل المراجل شمامي = ضراه عوده بالكرم والتساميح
ضراه شيخ له علوم ومرامي = شيخ وقف ضد الشيوخ الزحازيح
شافي ليا من رددوا العلامي = مثل البحر يتعب جميع السبابيح
شيخ لفعل الطيب والمجد هامي = ما هي بشيخة لابسين المشاليح
شيوخنا لثار عج الكتامي = والملح والبارود يقدح تقاديح
والجو غبر واغتشاه الظلامي = وجنايز الفرسان مثل الملاويح
في نحورهم يا ما غدا من غلامي = وبرماحهم راحت رجالٍ طحاطيح
لهم براس المجد عز ومقامي = ومراقب عليا بروس اللحاليح
هواجر لا جا نهار الزحامي = عاداتنا كسب الثنا والمماديح
مثل الجبال الراسيات الطوامي = صم الجبال النايفات الصلافيح
اليا لحقنا عند تالي الجهامي =تلافتت لصواتنا الفطر الفيح
في ضفنا العراء تربي سنامي = ويصبح لها لهود كبار مطافيح
ولا طار ستر مرودعات الوشامي = وتخالط الزغراد هو والتصاييح
بعنا عمار غالية ما تسامي = وفي عين شيخ الضد صرنا سفافيح
سقنا لهم من كل ظفر عصامي = اللين خيل القوم تقفي مدابيح
بشلف مضاربها تقص العظامي = من حاشته حول يروم الصحاصيح
وليا زهمنا اللي همومه تهامي = ومن دون حقه ينبحن النوابيح
جيناه لو دونه جموع تحامي = ونرد حقه غصب ما به تصاليح
وللضيف تبنى بيوتنا بالعدامي = يلقابها الترحيب مع هبة الريح
يلقا بها صفر الدلال الشوامي = صف على ضو حطبها من السيح
ماها زلال من من سحاب ركامي = غر المزون المعطرات المراويح
وكرامه للضيف تفعل لزامي = قعود ولا من خيار المفاطيح
هاذي عوايدنا جدادٍ وعامي = ولمحت للي يفهم العلم تلميح
ونحذر اللي جاشنا بالكلامي = ملقحين سمح الهرج تلقيح
قلته وانا من روس ربعٍ حشامي = ربعٍ فعايلها تشافي المجاريح
هل الشناين يوم ظرب السهامي = ترجح فعايلهم بالافعال ترجيح
ظفران لا من ثار عج العسامي = وكرمان يوم ان السنين الشحاشيح
ولا اقول حنا اللي خينا الوسامي = ولا قلت ش فيه غلطه وتجريح
لجواد دون حقوقها ما تضامي = وكل على حقه رعاته مصاليح
وصلاة ربي عد منشا الغمامي = واعداد ما هبة هبوب وتباريح