رفرفي يا رايات فوق أعلا الرجوم = رايةٍ يا صل صداها رفيع أطوالها
الصحافة تنشر أخبار وتودي علوم = وصلت علم المزاين بعيد اميالها
رقم واحد ما خذينه على كل الخصوم = في المزاحم رقم واحد لها وامثالها
الطويرش لا حضرت بددت كل الحلوم = بددت أحلام ناس تزوم احوالها
هن نجوم وهي سهيل على كل النجوم = فرقها واضح على جلها واجلالها
جامعتن كل الوصايف مع ذلك ردوم = جن كل اللي حضرن تحت ضل الالها
من سلايل ذود الاجداد مروين السهوم = يشهد التاريخ محصي جميع افعالها
ما خذيناها هديه ولا بحب الخشوم = جات في يوم يشيب الرضيع اهوالها
كم رمينا دونها فارس غوجة عزوم = عشته سحم الضواري صغار اعيالها
نرخص اعمارٍ غوالي لها عند اللزوم = كم نفوسٍ غالية حن سبب لاجالها
لاحصل عند التوالي ملاقاة وهجوم = تشره الجهال فيها منا على عقالها
عزوة تاخذ لها قسم من خير القسوم = لا سمعوا فيها احرباها يزيد إجفالها
لا تعزوينا بسالمٍ لنا حظ يقوم = عزوة آل جدي لازلزلت زلزالها
ونشكرك يا منظم الحفل يا نسل القروم = يا ولد من حطوا الطيب روس أموالها
الشجاعة والكرم عندكم هيوالسلوم = ما تضيع صفحة المجد فعل ابطالها
فعلكم مشهود وايضا على ذلك رسوم = الرسوم الواضحة يوم جاء مجالها
يوم جاكم مجرم ما قدر حمل الهموم = المنية فوق راسه تم احبالها
طاردينه كل من جاء وفي الدنيا يهوم = شاف في نفسه حسافة وشاف اذلالها
شلتوا اهمومه وعقب السهر عينه تنوم = وصعبة الاحمل ما شالها إلا جمالها
خلوا المجرم يعدي على روس الحزوم = والطوال النايفه راقي في جالها
ما يهمه طالب الدين لو جرالدهوم = لو تهب اعتى العواصيف ترسي اجبالها
القبيله تفتخر بك عسى عمرك يدوم = ما رفع عز القبيله يكون ارجالها