على الله يا نفس جرحها هيامها = وأنا في جهاد مع شرايد غرامها
تحلق بي افكاري وارافق طيورها = على وين تاخذني رهين انسجامها
سرت بي هواجيس الشعر ليلة الشعر = بعد ما تغنى في خيالي حمامها
الاعب بيوت الشعر واقنص روائعه = جفول النوادر في يديني زمامها
ولا شدني واسبل ذوايب قريحتي = سوى لابة كسب الخزاير مرامها
ربوعي هل العادات والعز رمزها = قروف تنومس من سأل عن علامها
قروف لهم في ذروة الطيب منزله = الامداح ربعي معتلين سنامها
لهم في زمان الدرع والطاس والرمك = سطور من التاريخ ترعف اقلامها
على المسرجات اللي كما الريح عاتية = نهار به العذرا تطوح الثامها
زمان خلط عج السبايا صهيلها = فكم جندلو من جهبذ في عسامها
تشوف العجب منهم ويعجب فعلهم = لا طول وطيس المعركة واحتدامها
خذو دورهم واقفوا الاحفاد باقية = كرام على درب مشت به كرامها
على السلم الأول ما تغير اطباعهم = على المرجلة والطيب تنصب خيامها
مع مروبعات بالمقاديم شامخه =يشد المسير من بعيد جهامها
بيوت على روس الروابي مشيدة = بها النار تشعم والدلال ايتامها
ليا من تنصوها المسايير فالهم = صحون الشحم ولاعود الأزرق ختامها
وإلى من زبنهم من شرب لوعة الزمن = يقفي ونفسه دالهة من سقامها
هذولاهم اربوعي وهذي صفاتهم = الامجاد والله مرتدين وسامها
ولا هي اسطورة من خيالي نسجتها = حقايق وتشهد للبواسل خصامها
كذا الطيبين وللمكارم رجالها = وباقي القبايل مالي إلا احترامها
واعود البداية ما كتبته ابمنهجي = على الله يا نفس جرها هيامها