من تغيب منكم ماله نصيب= ومن حضر منا كسبها كلها
رفقة الطيب ووصل فالقريب= جات والله جابها في حلها
عيد ثاني ليله وجوه رهيب= السما كن المزن تحتلها
والهوى ذعذاعه يسر الكئيب= وشمس ماودك تجي في ظلها
والخزامى والنفل مرهم طبيب= تبري جروح الزمن وتشلها
في ضيافة من يضدون الحريب= عزوة في الضيق مزين دلها
لاتهاب ولاتصد ولاتغيب= لادعت حدب الهنادي خلها
كم كسير وكم جريح وكم عطيب= كم وكم قوم تحاشى غلها
تكعم العايل وترفا للصحيب= والحمول الكايده تشتلها
ربع قرم لاحشى مافيه عيب= يبخص دروب العطا ويدلها
الهقاوي فيه تصدق ماتخيب= والمراجل ملته ماملها
نية بيضا وراس فيه طيب= كل عقده من دهاه يحلها
على أبوسعيد جعفر ماهب غريب= خابر دق الأمور وجلها
مجلسه مدهل لبن عم ونسيب= وأبلج عقد الحجاج يفلها
والدلال البن فيها بالحليب= جعل ماتقصر يدي من زلها
والذيابه ذا يودي وذا يجيب= عصبة ترتاح في محلها
والغوالي حولنا قبل المغيب= تسبي أنظار العرب بجللها
لونهن الحى شباب بدون شيب= في ظلام الليل ماتفطلها
طولهن فارع ووقفتهن تهيب= مايمل بها النظر ويكلها
رب ياواحد سميع و يامجيب= تحفظ اللي عزها ماذلها
قلتها والشاهد الله ياصحيب= ماطمعت بكثرها وبقلها

راشد اللقماني