الطيب سلم من سلوم الصقاقير = والشعر حده مثل حد الرهافي
والشك مايدخل قلوب المناعير = مادام نيات الضماير نظافي
وماقدر الله صار مافيه تغيير = بأمره ثقيلات الدعاوي خفافي
وقولوا لعايض لايسوق المعاذير = طيري ليا من مات عنده عوافي
يفداه من يحسب حساب المخاسير = وتبقين يالنفوس الضعيفه ضعافي
الطير طير كليب ومودع الزير = وروس النشاما ماعليه اخلافي
ونلقا بدال الطير ياصاحبي طير = لاهوب لا شامي ولا هوب صافي
ولا أنتجوا أهل المزارع من الجير = مهجنينه من شهر في المصافي
طرح الشبك عند الجبو تالي أعصير = قرناس بكر ماعليه أختلافي
أشقر وفيه سهوم ريش مغاتير = عارية من قاف غيري لقافي
عين الغشيم ان شافته قالت صغير = وعين البخيص تقول مدرج ووافي
في أسفل غواطي الريش دقه مناثير = وأفجح وسرواله على الوكر ضافي
اليا نطحته كنه ضابط مغاوير = واليا قفيته كنه بشت الخرافي
طويل عاتق ساقه جلال وقصير = وعرضه تعدا الطول والطول كافي
نلقاه ياعايض ليا جيت في خير = وانكفت صايد للبلد ومتعافي
هاذي هي اللي تستحق التباشير = وترقص طرب منها حروف القوافي
وغصاب لامن مات مابه مخاسير = طير السنافي فدوة للسنافي

راشد اللقماني