يا سعود ليت الليالي يومها حالت=لوهو تمني ما حالت دون خلاني
بين ألف حاجة وحاجة معي ما اشتالت=الا هواي وغذا قلبي وشرياني
وان اقفت بغالي ذكراه لا زالت=ما هي غريبة تشوف محمد يعاني
ما اظنها عن شفوف قلوبنا سالت=يوم اصدرت حكم حرمانه وحرماني
ما فيه دمعة ضحا فرقاه ما سالت=لحظة بها طاحت الدنيا من أعياني
والرجل حتى على المنهاج ما احتالت=الله لا يذكر الفرقا بالاحساني
يا سعود شف حالتي اليه وش آلت=وتعرف وجدي على خلي كم أشقاني
يا سعود عقبه وحبل السالفة فالت=لو أرد هداج أصدر منه عطشاني
الله حسيبي على الايام لا مالت=تردني عن هوى نفسي وتحداني
لكن مالت ما مالت والله ما نالت=من كل مبدا حواه اسمي وعنواني
يجوز تغتال فرحة بس ما اغتالت=وفاي لاصحابي وعزمي وايماني
من ما بصدري وغارات به اجتالت=صديت ما هيب لك يا سعود حقراني
هذي مهي مالتي يا سعود ذي مالت=من لا يقدر حقوق الجار والعاني
لا يا الخوي لو مشاوير العنا طالت=بتموت ما جاتك الزلة من لساني
وان قالت الناس والا الناس ما قالت=ما شفت من رجم شرف به وتلقاني
يا سعود والله لو انها صالت وجالت=ضيقة صدر بس مابه غيرها ثاني
واقول للصدر لا من جالت وصالت=يا ما من افراحي ويا ما من احزاني
بشر خوي الرخا ان ادوالها دالت=ويوم انه خلاني ان الله ما خلاني
والناس في نطحة العيال لا عالت=أنواع وانا لهذا النوع ما اداني
اللي يوالي مع الدنيا اذا والت=وان حاربت أقطع ذراعي اذا باني
تصير في عينه البيدآ وما شالت=من الرخامة بحجم اظفور الانساني

راشد اللقماني