كبارالاحزان لكبار الاصاويب=وكبر الاصاويب من كبر التخله
ضوح النهار انقلب كنه غياهيب=بحساب ما هو من حساب الاهله
وايمانا بالقضا ما يدخله ريب=لو كل صدر يذاود عبرة له
الموقف مهيب يا مشعان وصعيب=والقلب لولا الضلوع اخلا محله
والدمع ما الله خلقه بلا تسابيب=الا لحزه مثل هذي نهله
فان شفت دمع العيون مغرق الجيب=تراه حزن عليه وحشمة له
حزن على غيبة حصان الاطاليب=الغيبة اللي ما منها رجعة له
نبكي على من نحبه ما بها عيب=ولو ينفدا سيقت أنفس فدوة له
لكن هذي مقادير ومكاتيب=ما للبنادم عن المكتوب لله
رحنا من القبر بقلوب مصاويب=نبكي وعوج النصايب مسفهله
باللي تحتها تثني بالتراحيب=وتماري رجوم ونجوم مطله
يغيب جسمه ورسمه حي ما يغيب=بقلوب ناس تقدره و تجله
تبكي عليه المصاحف والمحاريب=والروضة اللي جعلها مدهل له
والطرقي اللي يدور للمعازيب=والعاني اللي يدور حاجة له
وتبكي عليه الدلال وشمخ النيب=وناس يتحرون منه عادة له
في مجلس ما على بابه حجاجيب=يا عنك يا ضيف منتب في ممله
ويبكي عليه المجود بالتلابيب=الطالب شحيح والمطلوب من له
يا كم و ياكم مضى له من تجاريب=كم فك دعوى وخلص من شكله
ولا هو على الصاحب يمس الاشانيب=وما عمره يجازي الزله بزله
يبين وقت اللوازم والمواجيب=ما يحسب المال وش كثره وقله
زبن المخلين في يوم التناديب=يوم الخليل يتبرا منه خله
ومحف العراقيب في روس المراقيب=يتعب بها الذيب يطرد جرة له
يا قاف يا وينك و وين الهناديب=ما فيك تستوعب التاريخ كله
يا ما من الطيب والجسرة على الطيب=ويا ما ويا ما ويا ربي تحله
وتحط له من فضل جودك مقاضيب=وفي يوم الاهوال في ظلك تظله

راشد اللقماني