الله من قلب من الوقت مكتوم = وإلى ذكر وقته يزيد انكتامه
والله من عيني قزت لذة النوم = وقلب من الهاجس تكدر منامه
هجسي يزوره كل يوم بعد يوم = وصار الشهر عنده يساوي لعامه
صحيح ما يجري للإنسان مقسوم = واشد ما تطري النفوس الندامة
ولا قلت يا قلب الخطا ترك اللوم = الهم لايأتي لنفسك اردامه
ان كان يا قلبي من الوقت مزحوم = أزبن على منشي المطر من اغيامه
وانص الرجال اللي لهم ذكر وعلوم = اللي لهم بالمجد شده وقامه
وذكرت لي من خيرة الجيل شغوم = اللي خذا من الطيب ذروة سنامه
جيته وعنزلي وأنا كان ما اقوم = وحطيت من قاع الوطا في العدامه
ابو محمد هادي جعله يدوم = بيت المروه والوفاء والشهامه
نادر حرار وصايد دون تعلوم = وصيده سمين ولا يصيد الهلامه
اشقر بعيد الطلع والكف مسموم = والخرب منه ما تشيله اعظامه
نداوي كفه من الصيد ملحوم = ويهوي من الكفين ما به غشامه
هادي هديب الشام واخوانه قروم = ولكل منهم في الوفاء شال زامه
لاول يقول اعنز على طيب القوم = تلقى الزعامة في محل الزعامه
وصحيح من قال الوفاء ساس وارسوم = والصنف يفرق قيمته نوع خامه
معرب الصوبين والعلم مفهوم = من الخوال ومعنزينه عمامه
يقدم على العليا إلى هابو السلوم = يانوم عيني يامجرى الكهامه
عمه وابوه لمقدم النجع زيزوم = وجده زعيم للسفلف والجهامه
لا شد يتلونه من البدو حثلوم = فعله يعدونه ونسمع علامه
وعادة يمير النجع بمهور وختموم = تشهد له العربان شرقه وشامه
يمام لسيره ولا هوب ماموم = هو قدوة الدرب الطويل ويمامه
وخلف حرار طلعها يبعد الحوم = كل اشقر لا حام يبعد محامه
وفي آل نايفه لا قلت ماني امليوم = ربع إلى جا العلم ليهم ازمامه
لابة شهاوين تهوم العداء هوم = حريبهم منهم شقى الوقت ضامه
لزوم يأتي منهم الخصم مهزوم = غلى اختلط عج الرمك مع ركامه
ولهم مع العالم ملازيم واسلوم = قدوة عرب مزكينها بالقدامه
والطيب من مجناه ماهوب معدوم = واللي يعرف الشرح يفهم كلامه
والطيب مشراف على القاع مزموم = يصعب على ساس الرخوم اقتحامه
ودرب الوفاء دونه شواهيق وحزوم = يصعب على ساس الرخوم اقتحامه
ودرب الوفاء دونه شواهيق وحزوم = ويصير من دونه جدال وخصامه
وللهون مدخال ولطيب داهوم = يقدم عليه اللسى يسوق الغرامه
والغانمه تبي لها قوة اعزوم = والاول يقول ابن الفدامه فدامه
لاجا الذي كنه على الوجه ملطوم = تشوف في وجه الفروم ابتسامه
يا كرهني والله لنقاله الزوم = هل النقيلي والحكا والنمامه
كم واحد من نية الخير محروم = وده وباركه عليه الرخامه
منال ما يطعم حدا منه مطعوم = والأقدار ما له من سنعها انهزامه
وكم واحد من دابر الوقت مهضوم = لو ناض وقته قاصر في خطامه
وتلقى الوفاء فعل الوفاء حتم محتوم = والرجل يفهم واجبه والتزامه
وانا بشؤون الناس ماني املزوم = لاكن ذا معنى الكلام ونظامه
وتمت بذكر محمد وانتم سلوم = وذكر الله في تال الكلام وختامه

راشد اللقماني