يا والله اللي جف عشب المساير = أبعد ثرها ويبس عشب الحشادي
الطرش من عقب الهيافي جواديل = كمل الربيع جابها قرين حادي
ظهورها تشدل وصف الغراميل = من سجت المرباع مثل المبادي
حلوا عدا للعشاير مداهيل = مدهال طراوة ارض التوادي
تسعين ليل عندنا كلها ليل = طافت وكن حنا في ليل العيادي
القيظ يمضي في حديث وتعاليل = وسوالفا يطرب لهن الفؤادي
سوالفا يطرب لها القلب ويميل = علوم الرجال اللي عليها اعتمادي
وإلى مضى عشرين من حسبة سهيل = وعشرا مع عشرا حسابه وكادي
نووا الشديد ودنوا الزمل للشيل = عقب المقبض وعزموا بالمنادي
يتلون فرسانا شيوخا حلاحيل = أطيورا تقنص في ليل الهدادي
وان جت من الأقصين رد المراسيل = رد البرا منهم ونادي المنادي
ثم صاح صياحا وركبوا هل الخيل = من فوق قبا مكرماتا جيادي
عاداتنا في الهوش كسب التنافيل = هواجر سقم الحفيف المعادي
من مدنا بالصاع نوفي له الكيل = لا جاء الزحام وعقلت بالعضادي
حن لعدوان الشريعة غرابيل = على النبي الهاشمي أخير هادي

راشد اللقماني