هذه القصيدة هي محاورة بين حمود الهلقي الدواوية من قبيلة العوازم وبين الشاعر عوض بن محمد الخضير الهاجري :
قال حمود الهلقي :-

يا عوض ذق ما جرا لي علبي الدامي = سهنةٍ من يوم سنو وانا فيها
لا خلص زام الجماعة وجا زامي = لصلعتك في احجرتك اتلاويها
لا قلطت لمقلطي ليك قدامي = والسيوب تحن فوقك وتوحيها
لا وليت اتشق في دين الاسلامي = والرقوق وغوصها ما تدينيها
عقب زمرك فوقنا ذيك الأيامي = فوق راسك يزمر اليوم راعيها
وأنت قرم كنك المخطر الحامي = والمراجل يا عوض وافياً فيها

قال الشاعر / عوض محمد الخضير الهاجري :-

قال ابو حمد في أثر قيلة العامي = لعبة وافي الخصايل امسويها
ولا تصير ببعض الابيات ظلامي = والظلايم هدمت حظ راعيها
والله ما شقيت في دين الاسلامي = والفرائض كل أبوها امصليها
تاخد التسقام واتريش قدامي = والكفايف قلت لي غايص فيها
منت بعلى قولك ولا صرت جزامي = يوم برقنا عرفنا ما فيها
تحسبي بارد الجاش نوامي = والرجال لها حقوق وحاتيها
في المكده يا مناعير ما اللامي = دائم نفسي على الكره حاديها
من ذكر دين الرجاجيل ما نامي= دينه نرجى عسى الرب يوفيها
وان جلس فوقي ليه اخوي واحزامي = وامشا من سهنته جيت واليها
أرمي النيشان وان الله الرامي = حدف ليل وربي اللي يقديها

راشد اللقماني