بديت باسم اللي بنا سبعن ارداف = من دون عمدان ومن دون اطانيب
بامره مثبتهن وهنه بميهاف = وارضه بسطها والجبال المناسيب
ومن عقب ذكره ما تلقف تلقاف = ولا فيه شي يصير من غير اسابيب
ماني بخبل دايمن يهرف اهراف = ياتيك لو مارسلت صوبه مناديب
وهاض الغرام وهيض القلب ماشاف = وقت تشوف العين فيه التعاجيب
وقت ارجاله جالهم عدة اصناف = ولاني بمسئولن عن الخبث والطيب
ناس خفاف انفوس واعزاز واشراف = كسابة الناموس واهل المواجيب
وناس يبون الطيب هرج وسولاف = طيبن يجي ببلاش مايلحق الجيب
والطيب بين من فعل طيب ينشاف = والناس تنشر له نشور ومكاتيب
ومن لا يحوشه باول العمر لا طاف = ما عاد يقدر له لاصاربه شيب
وناس ثقال انفوس وخباث واضعاف = يمشون بالنمه وشذب العراقيب
وناس غريبين الطبايع والاوصاف = شين غريب يرعب القلب ومريب
شين يخوف طيب العقل ويخاف = والخوف من راعي النجوم الثواقيب
والله لاسرار المخاليق كشاف = يعلم بغايات البشر عالم الغيب
ومن بعد ذا ياللي للامثال عراف = الشعر جاه من الاوادم عواقيب
ناس يجيبونه بليا تصراف = ومخربينن سمعة الشعر تخريب
والشعر له مبدا ومعنى وميقاف = لكن يبغونه بطق المشاعيب
واللي يشجعهم لهم سبب اشعاف = وتزايدوا بمكسرات الهناديب
احد يشجعهم غشيمن ومزهاف = ما يعرف العدله من ام العذاريب
واحد يشجعهم وله قصد واهداف = قصده يخرب لاجل بعض المطاليب
ولو فيه قاضي يحكم الشعر بانصاف =كان انصفه منهم بحق وتاديب
والشعر ماهو صف قافن على قاف = فن و وزن وقو معنى وترتيب
وكم شاعر(ن) تعجب معانيه وانضاف = ويصبها صب الذهب بالقواليب
هذاك وامثاله بدوا راس مشراف = مثل الحرار اللي بروس المراقيب
واستثني الطيب ولاني بعكاف = والحق حق يلزم الرجل ومصيب
وصلاة ربي عد من حج وطاف = على النبي ما يبدي النجم ويغيب

راشد اللقماني