يا حبيبي يوم كلٍّ عطاه الله حبيب= لوّ متكبر ومغرور ما منـّك غناه
ودِّي أملا من عيونك عيوني من قريب =كلّ ما اشوفك معَي قلت يا حَيّ الحياه
والله انّ اجيك وأهدّ لك هدّات ذيب= كلّ ما غاب القمر كل ما ظلـّم سماه
لا تحَسْب الجرح حسْب اعتقادك ما يطيب= كلّ جرْحٍ من جروح الهوى حصّل دواه
وأنت ما قصّرت شيّبت بي قبْل المشِيب=والهواوي ما احْد يقدر يعَذله من هواه
لك عيونٍ كنـّها اسْهوم واسْهومك تصيب=وأشهد انّ المبتلي فيك زاد الله بلاه
لو ابا اوصّف سوالفـْك سكّر في حليب= من عطاه الله منـّك صحيح الله عطاه
أنت ساعاتٍ صحيبٍ وساعاتٍ حريب=وانت من يامر وينهى واطيعه ما اعَصاه
يا عسى الله يرحم الحال ويقود النصيب=العرب من صاح مقهور قالوا وش بلاه
طرّ جيبي من غيابك وتكفى لا تغيب=لايمي لا قلت : يا طرّ جيبي .. لعنباه
كيف بصبر منـْك والجرح من حُبك عطيب=لوّ قلبي من حديده وكبْدي من حصاه
كلّ ابوي جْروح وانت المطوّع والطبيب=وكلّ يوم اقبل على الموت واكتب لي وصاه
وانت كلك منَ اقدامك ليَا راسك غريب=الجمال اخـَذت ملحه ومزّتـْه وحلاه
أتعجّب يا عجب يا عجايب يا عجيب=كيف سوّيت بحبيبٍ يحبّك ذا السواه

راشد اللقماني