سهيل نجمه قدلة ايام شفناه = وقفا سموم القيض واقبل براده
راعي الولع يفرح ليا حل طرياه = تمضي لياليه سرور وسعاده
ينسى هموم وسط صدره مخفاه = اللي بعض لايام تزعج رقاده
لقبل هداد مخضب كف يمناه = بدم الخريش اللي تحب النياده
غلاس طلع من عبدان مجناه = ابيض نحر وباقي الريش ساده
هجر عريض كامل في مزاياه = وزود على ذلك طبوع وركاده
لا شافه الصقار نوخ مطاياه = وقام يتذكر ما مضى من هداده
يوم السنين الطيبه كان يقناه = واليوم نفسه ما توالم مراده
اليا مضى لسهيل خمسين شلناه = من مربطه والموص طوف عقاده
وبعد اسبوعين ينقز دعيناه = وعقبه جهز للي تحب الشراده
خطوا خريش ما تعدا معشاه = بين العواسج صاير له مقاده
نوب تجي هارب ونوب محيراه = يرضي وعر وفي طرفها حشاده
يومه سمر بالطلع تل وعطيناه = وسبقه مع فتحة قزاز القياده
وقفى يهز الريش ولغيض يحداه = مطلي وهي قدمه سوات الجراده
عقبه طواها طوية الدلو لرشاه = مرهي ولو طارت طيار زياده
وادلا عليها با الحراب المسماه = سيف ابن غانم يوم فاخت عماده
من صفقته جاتك من الغيم مدلاه = وهو شهر يردم سما من عناده
وعقرب عليها من بعيد مذكاه = من طريته ما يحيي الصيد عاده
وحول بها القاع رويت من دماه = والريش غطا في محلة مصاده
وجينا وغديناه قلب وثنداه = وريش عليه الدم قاني سواده
وخبو مطاليق العيال المظراة = لجروم رمث مبطي في همادة
والنار في ظل المواتر شعمناه = وقامت توقد يوم حطوا وقادة
وسويت فنجال على الكبد محلاه = به زعفران خالطه مع قناده
وصبيت لربع المشاكيل مبداه = وقمنا نسولف بيننا بالهواده
تسوا حياة معثر ما لهم جاة= عند الحلايل ما تعدوا الوسادة
لا غاب عنها يوم قامت توطاه = ما تصدقه حتى يجيب الشهادة
يا الله عسى رب السماوات يمحاه = ولا عسى ربي يعجل نفاده
القاف لعيون الصقاقير قلناه = اللي بعضهم مهتني في قعاده
بيض الوجيه اللي تحاتي محاتاه = طلوع نجم سهيل يطلق قياده
وصلاة ربي عد غيم نثر ماه = على رسول الله ختمنا الافادة

راشد اللقماني