يالله يالله ياستار ياواقي=يا خالق الناس محصيها ورازقها
عندك مفاتيح قفل ابواب الارزاقي=خزاين الارض مغربها ومشرقها
عفوك العبدك وانا للعفو مشتاقي=وحقوقك اللي علي ماقدر اطبقها
والبارحه والبشر في النوم غراقي=ماغير اجمع هواجيسي وافرقها
اذكر زمانً مضى وافتش اوراقي=واقدم ايدي على الصفحات وافهقها
سرقني الوقت واثر الوقت سراقي=عذبات الايام يامسرع دقايقها
تطويك طي الرشا عجلات وسباقي=واطماع نفس الرجل ماهو محققها
وانست مثل التنمل في عظم ساقي=مادري من الوقت والا الكبر عايقها
ياعاشق الطيب ترى للطيب عشاقي=على طريق المراجل للقدم سقها
والطيب مثل الجبل صعبً على الراقي=ما ياصل المرجله ياكود عاشقها
واخبر ترى للمراجل جل ودقاقي=من طافته الاوله ماعاد تلحقها
والناس ماهم سوى طبعً ولا اخلاقي=سبحانه اللي خلقها ثم فرقها
ناسً الى جيتهم حلوين ورقاقي=تجلس معاهم ولا ودك تفارقها
ودك تقضي معاهم عمرك الباقي=مادام نفس الرجل مالاح بارقها
ون رحت منهم تحن الهم وتشتاقي=ودموع العين يدرج الين غرقها
ياليت مافيه جمعا ثم تفراقي=ياشين جمع الجماعه ثم تفرقها
وناسً الى جيتها منها الصدر ضاقي=ملامح القوم تظهر لك حقايقها
مجالسً في طرفها البوم نعاقي=يقفى السوالف يومحقها ويسحقها
نفاق ومجاملات وكذب وطباقي=يضيع بين الكذوب وبين صادقها
البعد منهم غنيمه واقطع الساقي=صك النوافذ مع البيبان واغلقها
وعليك باللي لفعل الخير سباقي=وشهادة الطيب في يمناه علقها