ياهجوس بين حدب الضلـوع إلهـا دوي
كن دويها سيل وادي معـا راس شرفـه
هيضتنـي وادخلتنـي طريـق ملتـوي
والدروب العـوج دايـم وراهـا تكلفـه
لابغيت اسري مع الليـل مـادور خـوي
الخوي رشاشي اللي معـه كـم سعفـه
مايخوفني عـواء الذيـب لاقـام يعـوي
ولا دخل قلبي من اعواه خفـه ورجفـه
كان قلب الذيب قاسي فانـا قلبـي قـوي
ذي صفات الذيب وانا معي مثلـه صفـه
بدوي واعيش واموت وانا ابـن بـدوي
ماتعلمت الضعافـه ولا عشـت ضعفـه
الليالي علمتني على المسـرى عشـوي
ماهتنيت براحـة البـال ورقـاد الدفـه
مهتوي مشي معا البيد واطويهـا طـوي
والمولع كل ماشـاف لـه بـرق شعفـه
مايوسع صدر راعـي الغـرام المهتـوي
غير مشي في قـرارة وشـراف طهفـه
ياوجودي والمحبة كـوت قلبـي كـوي
من وليـف جـر قلبـي وتلـه وحذفـه
جيت له عطشان بشرب من الماء وارتوي
في رجاء هرجٍ هرج به من اول واخلفـه
كن عينه لا لحظني كمـا عيـن خلـوي
شايف الصقار يرمـي زريقـه وخطفـه
كنه مطرق خيزران زواها الله زوي
ينعطف ثوبي عن الساق من شي اعطفه
مستوي بالعقل والزين اصبح مستوي
ياعذابي من غرام الهنوف المترفه